काठमाडौं। हेटौंडा–काठमाडौं सडकमा सवारी चाप बढेपछि जिल्ला प्रशासन कार्यालयले ‘वान वे’ रुट सञ्चालनमा ल्याएको छ। जिल्ला प्रशासन कार्यालयले साना यात्रुवाहक सवारीका लागि आउँदा र जाँदा फरकफरक रुट प्रयोग गर्नुपर्ने व्यवस्था गर्दै आज (मंगलबार)देखि कार्यान्वयनमा ल्याएको हो।
प्रशासनले १४ सिटभन्दा कम क्षमताका सवारीसाधन भीमफेदी–कुलेखानी–सिस्नेरी–दक्षिणकाली हुँदै काठमाडौं आउने छन्। काठमाडौंबाट हेटौंडा जाने सवारी फर्पिङ–फाखेल–कुलेखानी–भीमफेदी हुँदै जाने गरी तय गरिएको छ।
जिल्ला प्रशासन कार्यालय मकवानपुरका प्रशासकीय अधिकृत सन्तोष सुवेदीका अनुसार, मालवाहक तथा ठूला यात्रुवाहक सवारीसाधनले काठमाडौं आउँदा त्रिभुवन राजपथ र फर्किंदा कान्ति लोकपथमार्फत फर्किनुपर्नेछ।
मुग्लिन– काठमाडौं सडकको धादिङ खण्डस्थित कृष्णभीरमा पहिरो गएपछि सडक अवरुद्ध भएको छ। जसका कारण हेटौंडा हुँदै आवतजावत गर्ने सवारीको चाप बढेको छ। त्यसैलाई व्यवस्थापन गर्न प्रशासनले वैकल्पिक सडकमा सवारीसाधन चलाउँदा एकतर्फी (वान वे)को व्यवस्था गरेको हो। यसले जाम हटाउने अपेक्षा गरिएको छ।
बिज्ञापन
